قصيدتين عن بلاوي العشق ولوعات الغرام

القصيدتين عتج واحده منهما
الاولى بعنوان " أبعــتذر" للشاعر الأمير بدر بن عبد المحسن وغناها فنان العرب محمد عبده
والثانية بعنوان "تقوى الهجر" للشاعرة "الأمل المجروح" وغناها الفنان القديرخالد عبد الرحمن

واللي تلحينها ما طول أكثر من ثلاثة أشهر لكي تظهر بالشكل الذي ظهرت عليه وبالفعل لاقت أغنيه خالد عبد الرحمن نجاح يوازي نجاح أغنية محمد عبده.

المهم هذي القصيدتين ظهرت عنهم إشاعات وايد ....ناس تأكدها وجماعه يقول مو صج ولكن الأكيد والأكيد أن المقصود في أبيات هالقصايد الثنتين لبعضهم بعض...لان قصيدة الأولى هي "أبعتذر" وقصيدة الثانيه " تقوى الهجر" كانت الرد عليها..!

والإشاعة اللي تناقلوها الكثيرين عن القصيدتين مادري مروجين هالإشاعة صجهم من جذبهم بس عجبتني القصة الي احبوكها.... وهي أن الأمير كان يريد أن ينفصل عن زوجته اللي هي "الأمل المجروح" لامور الله العالم فيها ...بلااااكت ما قدر ينطق ويقول لها بوجهها ما ابيج! لكن طرشها لبيت أهلها.

وبعد مرور ألأيام والليالي الطويلة بعث الامير لها هالقصيد مع أحد المراسلين وعقب ما قرأت قصيدته أغمي عليها وفهمت منها أنه طلقها؟ ويا عيني عينها ما تستاهل وقالت فيه هالقصيد رد على قصيدته...مع العلم بأن 'الأمير' كان يعشقها بجنون..ولكن الفراق كان بسبب ظروف قاهره !!.

وهني نربط القصيدتين "أبعتذر" و"تقوى الهجر" مع بعض على شكل دويتوا بين العشاقين حتى يثبت لنا بان الخبر مو أشاعه بلااكت واقع والله يجيركم من لوعة العشق والغرام....

الأمير:أبعتذر

الأمل المجروح :لا تعتذر

الأمير:أبعتذر عن كل شي إلا الهوى ما للهوى عندي عذر.. أبعتذر .. عن أي شي إلا الجراح.. ما للجراح إلا الصبر

الأمل المجروح: دام الهوى ماله على قولك عذر...والجرح يا جرحي يداويه الصبر ليه العذر

الأمير:ولو ضايقك إني على بابك أمر في ليلة ألم . . واني على دربك مشيت عمري وأنا قلبي القدم ..أبعتذر ..أبعتذر كلي ندم أبعتذر عن

كل شيء إلا الهوى مال الهوى عندي عذر ..أبعتذر عن أي شي إلا الجراح ما للجراح إلا الصبر

الأمل المجروح:لالا تعنى لي وتمر وتبغى الصبر ..وين الصبر؟ جــرحــي عـــمـــيــــق والقلب في دمه غريق !وتبغى الصبر!ويلاه من وين الصبر.. مهما تقول لا تعتذر ، مهما تقول من الأغاني والجمل..ما يحتمل قلبي فديا جبر الألم يمشي معك درب الندم ما يحتمل ، يكفي عليه منك احتمل كذب وغدر، حبك سراب ضيعت وقتي اتبعه يكفي عليه

الأمير:تصدقي ما اخترت أنا أحبك محد يحب اللي يبي ...يا حبي المر العذب... سكنت جروحي غصب ، ليت الهوى وأنتي كذب

الأمل المجروح:يكفي عليه منك احتمل كذب وغدر ، حبك سراب ضيعت وقتي اتبعه ، وسط الضباب صوتك ينادي أسمعه صرت أتبعه

الأمير:أبوعدك كان الطريق بيبعدك . . أبمشي في طريق

الأمل المجروح:تمشي في طريق . . وين الطريق اللي يوديني لبعيد عنك يا أول رفيق البعد يعفيني المزيد

الأمير:أبوعدك كان الجحود بيسعدك . . مالي رفيق

الأمل المجروح :وين الوفا والتضحية . . وينك رفيق

الأمير:أبجمع أوراق السنين وأودعك ..

الأمل المجروح:بتجمع أوراق السنين . . لا تنسى تجمع جروحي ودمعي وآهاتي معك وقلبي بعد ما قتلته يا رفيقي ما عاد يقدر يمنعك

الأمير:أبعتذر أبعتذر كلي ندم أبعتذر عن كل شيء إلا الهوى مال الهوى عندي عذر

الأمل المجروح:وين الندم بين السطور . .عمر العدم ماله ظهور .. ترى هذا غرور . . هذا غرور

اشوه الدنيا فيها خير ....في ناس تحبْ وناس تنحب

http://www.youtube.com/watch?v=tQemfvgkFbk عبده " ابعتذر"

http://www.youtube.com/watch?v=kSq5JNsEUmQ&feature=related احلام "تقوى الهجر"

آه ........على ايام الطرب والفنون

اول كنت احب اروح العروس علشان نشوف حبايبنا وطوايفنا
واهلنا وأناسه وضحك ....والنفوس الحلوه والدراريع اشكال وارناق والثياب (جمع ثوب) الزري منها و المفحح مال اهلنا بالبحرين والنشل والتور ابو نقطه لحريمنا الكبار اللوان واشكال ....ومن ذاك الصوب فنون العديد(الطواقيق) يطربونه بالطرب والاغاني السنعه من هالسامريات العجيبه الي ما توقف وعقب يدورنه مثولث ولا طمبوره او دوسري وعقب يلوة العروس "امينه في امانيها..." ولا كيك غاتوووه ولا ورود ولا الله قالها صماط ممدود بالارض بكل ماطاب ولذ ... لانه حوف وطباخ بيوت مو مطاعم وسلوق وتالي الليل ذا تمخمخ الراس شالوها من هالخماري الي يعدل المزاج ويسلك الاذن وتعالوا شوفوا فنون الرقص العجيبه حيث الوحده من هالابني اسماللله عليهم الي وقفت وورتنا طولها بذيج السامريه العجيبه ماودج توخرين عينج عنها من زين رقصها والركاده بالحركه وتتمايل والطرب متمخمخ من راسها الي ادنا ريولها وتشوفون الوحده منهم بالميد شمرررررره ورازه الراس والشعر يتطوطح يمين وشمال ماتقولون الا ان الطيرران والطبول ما انشالت الا حقها... فن وغواااه وشيْ ٍ عجيب ، وإللللللي شالوها فن البداوي تعالوا شوفوا امهات شعر البريسم الطويل الي امغطي اجتوفهم يتهدل واصل الي قفاهم...الوحده منهم تقضب اول الميد الي ما اخره...وهي ترمح مثل الفرسه على شيلة الصفقه والتصلوت واغاني القلطه وتلفح لفاح بالشعر... ياسلام سلم ( مو لفاح الصلْـب اللهم ياكافي تقولون بنكاه تفترعلى ميز)... ذاك زمان والحين زمن

اما اليوم يادافع البلا من يدخلون العرس لازم العلج بحلوجهم يتمطخ ويعقدون النونه(الحواجب) وين الي وين الي فيهم من اتبوسم من قلبها..وعقب يشتغل الحش و القرض والمخوزر بالي حوليهم ...والي انا مستغربته بعد شكوووو السوالف بالميد وانتوا ترقصون؟ اشلون بتطربون اذا بتسولفون..وبعدين وش نمونته هالرقص تمشي وتنقز وهز اجتوف على غير معنى الطق بصوب ورقصها بصوب....!! بالله عليكم هذا رقص ولا طرب؟ وين اهل السامري والفنون ما يعلمونهم الفنون على اصولها ...وكله بصوب والنفانيف بصوب ياويلي ويلااااه لاذوق ولاسنع كل شي معروض بالسكه...ياربي ليش هاللحم البارد ؟؟الي هالدرجه برد لحمكم ماكو غاريه وخوف على نفوسكم ولا على بناتكم من هالكاميرات الي بتليفونات والا امهات العيون الحاره اللي اعيونهم ابد ماتتثـــنى أرض أرض جو وإلا انتي وحبايبج منسدحين بالمستشفى من عيونهم اللهم ياكافي...والله لا يقوله..ولا تصبخ الويهه وقردي قرداااه وشنجابل عراكوزات مو بنات اهو احمر واخضر وازرق وذهبي واهداب مشككه والطحين الللي لايصينه بالويييه لووص وكل هذا بصوب ولون الشعر بصوب اشلون تصبغين شعرج اشقر وانتي سمره و لونج حلاي ومحوحيه لا واعيون زرق مادري خضر من تقصين عليه ..؟ ولاااا خصل الشعر الاحمر والابيض واللوان واشكال وضيم وضلايم ياربي ماتشوفون روحكم بالمنضره قبل لا تطلعون من بيوتكم!!ا

يعني بدل مانروح العروس ونستانس ونوسع صدورنا بالطرب الاصيل والجمعه الحلوه....نروح عروووس لا فيها لا طرب ولا فنون وكل الاغاني يا مالقه يا الطق فيها بارد، ويا هز ياوز خلووووه وقطع .

وفوق هذا وش بنجابل !! بنجابل هالنماين انفــــــين الذكر( العركوزات ) صج انهم طماشه.... بس ياربي بنيـــــــــــــمع اثام بنهاية كل عرس من تعليقاتنا عليهم لاننا ما انعرف نقعد براحه لازم انعلـــــــق على كل شي غلط .وهذا طبع فينا كــسـييييييييييييف يا اهل الكويت.

المهم والمراد من هالبوست ليش ماتصير العروس اقل تكليف واكثر بساطه واناسه ومن غير مسايق ومزامط وتهلق بالخلقه واللبس وليش ما يغلب على عروسنا الطابع الشعبي الكويتي العريق الي اهم شي فيه البساطه والاناسه

والطرب الاصيل

بشهادة اهل الخليج كلهم

وياويلي ويلاااه بعد جم سنه هالجيل اليديد ما رح بيدري لا عن فنوناااه ولا غناوينا ولا عاداتنا ولا تقاليدنا ما اقول الا قمــــــــــــــــــــــيضه.

الله يا دايم

عاشووو اهله ....اهداء للخْيال المغوار مشاري بمناسبة عيدميلاده وكل عام وانت بصحه وسلامه

كلام يقرقع بقلبي

خلوا عنكم الرياضيات و والأرقام !
الحين بالله عليكم .. العمر ، ولا الوزن او الطول .. مو هي بس أرقام ؟!! وش لكم فيها ؟!لاتحسبونها وتقولون أنا كبرت ولا انتفخت!!
خلوا الدختاره هم اللي يحسبونها .. انتوا مالكم شغل .. هاااااوو عيل ليش ندفع للدختار .. وييمع الفلوس على قلبه خله يشتغل ويحلل معاشه!

بالعربي : لا .. تحسبون ..الارقام وخصوصا اعماركم .. !

صاحبوا الأصدقاء اللي يحبون الوناسة ووساعت الصدر .
يا ربي ترى أصحاب الهم والغم واللي يتذمرون وايد يييبون لكم الغثا والماحي وضيجة الصدر !! وخروا عنهم .......قطيعه

( ملاحظة لكم : واذا شفتوا من ربيعكم اللي يحومون الجبد بحنتهم طسوا بعيد عنكم .. حطوا ببالكم أنكم من النوع الثاني ..! )

لاتتوقفون عن التعليم!
تعلموا الكمبيوتر ،الحرف اليدوية ، الزراعة ،الطبخ، أي حرفة .. أي شغله ! بس تعلموا !!لا تعطلون مخوخكم أبداً .. خلوها دايماً في وضع التشغيل ! لان المخوخ الفاضية .. هي مصانع لتكوين نسيج الزهايمر..... يادافع البلى استأنسوا بالأشياء البسيطة !

قدروا واستأنسوا بكل شي تطيح عينكم عليه

بأكله حلوة تحبونها .. بصوت البحر و لا طيوراعجبتكم ولا مطر او باجتماع عائلي حميم .. بمنظر الغيوم .. أي شي ..!عيشوا اللحظة الحلوة ......وكيفوا فيها ترى الثانية إلي تمر عليكم ما ترد ابد .ليش تكدرون صفو اللحظة الحلوة اللي انتووا عايشنها لم تذكرون وتجترون الهم والغثا اللي صار لكم قبل يومين من فلان قال و فلانتانة قالت ......طااااف من أقصى الضميري !!و لا تصيرون مو ويهه نعمة !

أضحكوا ضحكة قوية.... ومن اقصى اليوووووف (القلب) .. !
عطوها ضحجة طويييلة و بصوت عالي ( طبعاً مع اربيعكم .. ولا يخرب برسيتجكم ) .. ضحجة تخليكم تاخذون نفس عميق ..تحسون معها أن كل الأكسجين اللي بالعالم دخل في كامل رئتيكم !!واذا عندكم أصدقاء مرحين وتضحجون معاهم على طول .. استغلوا الفرصة واقضوا معهم أطول وقت ممكنة!

الدموع لابد منها !
ما نعرف قيمة الأفراح إلا من لحظات الأتراح تحمّلوا .. واحزنوا .. و .. طوفوا مابقى من العمر كثر ما مضى الشخص الوحيد اللي يستمر معاكم طول حياتكم هو نفسكم فلا تحملونها ما لا تطيق من الاحزان طول حياتكم عيشوا حياتكم بمرح دامكم عايشين !!

خلوا دايماً الأشياء اللي تحبونها حواليكم ..و تحيط بكم ..
سواء كانت عائلة .. حيوان أليف تحبونها .. نبته ترعونها بنفسك .. هواية .. WHAT EVER ' أي شي '!

البيت .. هو ملاذكم الوحيد .. فأجعلوه مأوى للاستمتاع ..

صحتكم ..!
إن كانت ممتازة .. أحمدوا ربكم .. و حافظوا عليها ..وإن كانت غير مستقرة .. حسنوها بالأمل .. واهتموا فيها أكثر ..وإذا ما قدرتوا تحسنوها .....بسيطة اطلبوا المساعدة ..مو غلط

لاتروحون مع نفوسكم في رحلات على طيران خطوط التعذيب الذاتية للوم والإحساس بالذنب !
الا روحوا رحلات للتسوق ، البحر ، للبر ،للسافر .. أي مكان فيه سعادة لكم و أناسه .. ولكن إياكم ورحلات تعذيب الذات

قولوا للأشخاص اللي تحبونهم .. انكم تحبونهم ..في أي وقت وبكل وقت تسنح الفرصة ..!
ستندمون وايد ً..إن رحل عنكم هالشخص الي انتوا تحبونه وما سمعها منكم..

وسلامتكم وتعيشون وعساني ما ثقلة عليكم