أم الحفــــيز

ً أُُريدُ حلا

من المعروف بان كل وحده و واحد فينا يحب النظافة والسنع في المكان إلي يعيش فيه و علشان جذيه اكو بيوت عندهم غرفه خاصة للخطار (الضيوف) ما تنفتح إلا إذا ياهم خطار او ضيف.... لا وتكون الغرفة فيها كل شي كشخه وسنع ويديد حق الشوح جدام الضيوف،وباجي البيت الله يستر بستره من اللويه والعفيسه، بس ناهيتكم عن غرف نوم بعضهم يا دافع البلا تقولين عافور سنومي عيار بالغرفه عوره...المهم كيفهم غرفهم وهم حوريــــن

بس هالشعور الامباله لا يطبقونه بالسكيك وبالشوارع والمجمعات وسواحلنا
ياربي عيب وشي غير حضاري نزل جامة دريشت سيارته وحذف كلينكس ولا قوطي بيبسي ، ولا بالمواقف طلع طفاية الزجاير وحذف إلي فيها على القاع، ولا الي يحذف قطوف الزجاير وهو ماشي ، وعلى الساحل وشواطئنا المزبله قايمه ماقعدت اهي قراطيس وقشور موز وتفاح وبرتقال...الخ وقذورات وجياس جمعيه ،ولا بالسينما قراطيس الشوكلاطه والعلوج بالارض ، ونفيش نعمة الله بالارض ياربي احلوجكم الى هالدرجه راخيه وتسرب الاكل !! بعد نفيش من العلبه الى الحلج ولا البحامه في الاكل مو قادرين يلحقون لقمه ورا لقمه !! ،وناهيتكم على الي يفتح باب السيارة عند الاشاره يا كات خشمه يا تافل عزكم الله...ابي اعرف ليش هالقذاره والدناسه ودناوت النفس لو انتوا بأوروبا ولا هالدول الغربيه اتسون جذيه؟؟ حشا عليكم ماسويتوا
ولا حبيبتي الكويت بس شعار ...ياربي الاسلام هو دين النظافة والمسلمين لازم عنوانهم النظافه اولاًبالتصرفات وبالقلوب والله خير الدوله موفره الي ينظفون الشوارع يوميين اكثر من الهم على القلب...يعني لازم قانون وغرمات حتى بعض هالاوادم اتسنع؟؟
انا اقول الحل الوحيد هو البيت كل ام وابو بالبيت لازم يعلمون أعيالهم أصول النظافة ولا اشقولكم انا غلطانه ولا انا امبالغه بالموضوع؟؟