غطايا
يازين الاشتا..... ويازين لمت البر مع الاهل وربيعنا
ودام ان موسم البر هل علينا..... والبْران انترست بهالمخيمات بعد مايبيلها....بيت شعر ومطارح و دوه وجاي مقند مع دلة القهوه والحليب باليرنزبيل والكستنه اتحمش على القرم وطوس الرهش والدرابيل وقرص عقيلي وخبز الرقاق والخمير من صوب والفروه على اجتوفنا ومجابل مجلسٍ مافيه نفسٍ ثجيله ...وتبدي السوالف والغطاوي وان حصل طيران وطبول بعد خوشٍ على خوش سامريات ومثولث ودوسري ويباب وثياب... ونشوف طول اهل الطرب يا سلام سلم يا سلام ....وعليه انا اليوم بعطيكم اغطايا وابي جوابها
اللهم صلي وسلم على محّمد والف الصلاة والسلام عليه....الغطايا تقول
جانا طارش ٍ من ديرة ، تراب ٍ ما فيها، قلطنا له لحمتين عظام ٍ ما فيها
عطوني الجواب
هناك 6 تعليقات:
إي والله ،،
يا حلو طلعة البر
بس هذا السؤال اللي كتبتيه
ماله عندي جواب
زين إذا فهمته
:)
تحيّاتي لك
ميامي
ياحـــــــــــــــــــافظ مو كويتيه؟؟؟
اذا ما فهمتي معنى الطارش فهوالضيف او المرسال
وقلطنا له يعني قدمنا له
ياللله حبيبتي شغلي مخج
البر الحين روعة
:) ويا زين الشوى واليمعه مع الاهل
الغطاية ما عرفت والله شدى حيلج وقوليلى ساسرينى ;)
يا حلو البر واهله
ويا حلو الغطاوي
حل الغطايا الله يسلمج هو :
الياهل المولود توه اول ما يطلع من بطن امه يبي يرضع
( قلطنا له لحمتين عظام ما فيها )
مشاري
شساسر فيك الله يهديك؟؟؟
شوف سوالف اسمالله عليها فطينه عرفة الحل بسرعه
سوالف
اسمالله عليج....صج انج فطينه وعروقج بالماي......تبون وحده ثانيه؟
إي والله ياحلاة البر و قعدة الخيمة بالليل..وحلاة الجاي المهيل مع البسكوت و الغريبة..وحلاة طباخنا و بربستنا بالتراب..والقعدة من الفير للتمشي و المقناص..
حسافة على برنا اللي صار للمخيمات و البانشيات.
إرسال تعليق