أم الحفــــيز

الرجل الذي لا تنساه المرأة

الرجل الذي يكون كريم في عواطفه ويده ويهبها الأمان والحنان - مو الجعص يادافع البلا.ا

اللين في تعامله - الرقيق في مشاعره - القوي الشخصية بلا غرور -الواثق من نفسه - مو التشخوواااه قطيعه.ء

تشعر وهي معه برجولته وأنوثتها - مو طنبور طين.ا

إذا تحدث تنبهر من أسلوبه وحسن حديثه ولا تمله - مو الحننان..قطيعه.ا

يدللها ويرويها عشقاً - ومو المنان ...امحق.ء
يتقن فن النظرات تجاهها- مو الي يخوووزر ومبرطم خلووه.ء
يقدر إحساسها ومشاعرها و يحن عليها عند حزنها وألمها - مو من قوم مكاري.ا
يستمع لها ويقدر رأيها ويطلب مشاركتها ويحترم رأيها - يعني ما يجعم .ء

الذي في بعض الأمور يفضلها على نفسه - مو اللي يقول يالله نفسي
الذي إذا كانت أخطائها بسيطة يسامح ويعفو عنها - مو يسوي من الحبه قبه.ء

يكون غيور عليها بدون تحكم أو تسلط - مو سي سيد.ا
يطرب مسمعها بكلمات دافئة مليئة بالحب و الغزل - مو بس يعذرب فيها.ا

أن يحتمل تقلب مزاجها ويشاطرها المزاح والضحك- مو الطبانه.ا

يفرح إذا فرحت ويحزن إذا حزنت ويقف معها سنداً لها - مو يصير لها مقز مريج.ا
الذي تشعر انه يحتاجها في كل لحظة - مو الوطب ودعله.ا

الذي يفتخر بها ويراها في عينه غالية جوهره ثمينة- موالللي ما تنترس عينه.ا

أنا ابصم بالعشره واجزم بأن في رياييل عندهم هالمزايا(الللي على اليمين) اذا مو اكثر ....وحريمهم والله متهنيين معاهم
وما اقول الاالله يتمم عليهم....ا

وكذلك انا متاكده... أن في ريايل فيهم هالمزايا وودهم يفعّــلونها.... بس يبيلهم من الي يعرف اشلون يدق هالطبايع سللللللللللف ويشغلها وهني اقصد النصف الأخر.ا

بعض ٍ من هالحريم الي يادافع البلا في راسها حبٍ ما انطحن وموووقه على ريلها مادري على شنو..؟؟وعقب تقعد اتشكى واتعذرب بهالفقير المسجين الي كل ما بغى يحاول يعدل من عمره تقوم أهي وتكسر بمجاديفه على أبو انه ما حب يتغير الا اذا بغى شي و لا انه ضعيف ولا منكسر....وهني انا بأقولج لا اعيوني لا... بطلي اذانج وحطي اذاني واذانج اربع وسمعي الحجي الي يييييميد على اطوال الشوارب ...ا

الي تربينا عليه وعرفناه ان الريل بنسبه للحرمه هو عزوتها وسترها وظهرها وسندها وظلها...وبنت الاجاويد تطلع من بيت اهلها وتدش بيت ريلها معززه و مكرمه .... ومــــردْها ما تطلع من بيت ريلها الا بجفنها . ولا ليش سموها عـِشرة عمر...والعشره مو معناتها اشكثر دفع لي ولا اشترى لي وحط لي... العشره هي اشكثر حبني وحبيته واشكثر عزني وعزيته واشكثر استحملني واستحملته وعمرها ما انقاست العشره الزوجيه بالــكــــم...... بلاااااكت تنقاس بالكــــيف ...ا

يعني كيف تكون العشره ...بالصبر على المر والتحمل والحكمه بالراي...والريايل طبايع وأرد نوع فيهم البخـــــــــيل اللهم لا تبلينا ولا تبلي حبايبنا لان هذا النوع من الريايل ما منه أعلاج ابداً و يادافع البلى هذا الي فيه هالطبع يسمونه مرض وعاها وغضب من سبحانه،،، ولا الباجي من طبايع الريايل تقدر أي وحده منا ان تسلك معاه وتتحمله بالسياسه ....خوووو السياسه مو بس بالميلس ،، حتى في البيت وتعتبر بعد فـــــــــن وحنكه ومهاره ...ولا ليش الاوليين يقولون عن فلانه سنعه و قويه ؟ تعرفون ليش ؟ لانها قويه في التحمل والصبروتفوض امرها لسبحانه مو لعوير وزوير والمنكسر والي مافيه خير يعلْجون سالفتها وتصل اخبار مشاكلها بأذااان القاصي قبل الداني يعني قويه مو لان لسانها يلوط اذلنها ...ولكن قويه لانها تستخدم الفطره اللي سبحانه انعم فيها عليها من دون سائر البشر فطرة الأمومة في التعامل مع البشر... واخذيها مني وانا اختج الريل مع الوقت يصير مثل ولدج يحب يدْلع عليج ويطفرج أحيانا ويداحرج مرات تعرفين ليش لان يدري ان صدرج وسيع ويوسع لكل مشاكله ومشاكساته خوووو ماكو ميااانا بين الريل و مرته بعد تصير االسالفه بينكم خوووووش بووووش. فعلشان جذيه اذا شد رخي وان رخى لا تشدين على غير سنع.ا

.

وجذيه نقدر نقلب العنوان إلى

المرأة التي لا ينساها الرجل

اللهم اني بلغة اللهم فاشهد

ولا اشقولكم؟